Ido prizentesis che la linguoferio EXPOLINGUA 2006 en Berlin
Dum la tempo inter la 17ma e 19ma di novembro 2006 en la Germana chefurbo Berlin eventis la 19ma linguoferio EXPOLINGUA.
La diligenta Ido-Amiki Berlin pos 2005 la duesma foyo aranjis estaleyo pri Ido.
Pos la ferio la organizinti dil Expolingua informis ni, ke 15.100 personi vizitis la linguiferio dum la 3 jorni,
preske la sama nombro quale en la
pasinta yaro.
La cayara moto dil organizinti esis precipue prizentar la lando Hispania e
lua linguo/-i.
En nia vicineso esis estaleyi di la guvernerio di Navarra, dil universitato di Compostella e dil Andaluzia.
Apud ni esis expozeti dil Araba (Siria),
di Nova Zelando, di la Greka universitato di Thessalonika e di la surdi.
Anke la Ido-Amiki Berlin precipue prizentis la laboruri di la Hispana
Ido-Societo.
Omna 18 exempleri di "Adavane", plura
libri da fervoroza sioro F.Tejón e docolibro en Hispana esis expozata.
La bele aspektanta propagili en Hispana, Franca, Portugala, Angla, Germana e
Rusa balde esis forprenita.
Dum la lasta hori kelka mankis.
Ni prizentis libri e literaturo anke
de altra landi.
Ni precipue informis pri la voluminoza vivo di Ido en interreto ed aludis a
diversa interreta-situi.
Kompreneble nur parto de la 15 mil vizitinti volis konoceskar e saveskar ulo
pri Ido.
Tamen omnajorne dum 8 hori la Ido-Amiki Berlin informis e diskutis kun nombroza vizitanti ye nia estaleyo.
( Volunte ni prizentabus anke
stranjera Idisti por montrar la internacioneso, ka forsan sequanta-yare ... )
Qui esis nia gasti kurioza ?
Certe multi venis de multa urbi e loki di Germania, ed anke multa Germane
parolanti de diversa landi Europana.
Me tre rimemoras pri konversi kun
Parisanino e kun Albaniana muliero perfekte dominacanta la Germana.
La plumulto vizitinta nia estaleyo esis geyuni plu yuna kam 35 yari.
Astoniva : multa personi de Rusia , ed exemple de Kazakhstan.
Ultre la konocemi, me konstatis, ke tre multi serchis en la Expolingua
moyeni por studiar la Angla.
Me anke konversis kun poligloti qui
ne prizas lingui konstruktita. Segun la poligloti , a tala lingui mankus la anmo
, kulturo ... .
Nordafrikano opinionis, ke me esus adheranto di nova kolonialismo, pro ke
Ido esus sintezo di nur lingui Europan.
Pro quo ne Araba ? Ica linguo
esus komprenata de Maroko til Indonezia.
Anke Esperantisti vizitis ni. Lia ofta questiono, qua diferi esas inter la amba
lingui.
Itere ni konstatis, Idisti bone savas Esperanto, la plu multa Esperantisti savas
nulo, preske nulo pri Ido.
Quo nun eventos ?
Tre balde ni intencas invitar la interesemi por kursi e por interretal o letrala
kursi, naturale gratuita.
Ka ni ganos pos kurso plusa idealisti e kunlukteri - ni esperas lo . Ni
expektas konstanta laboro Idala.
Ni volunte volas ri-partoprenor
ye la Expolingua 2007, nam un de maxim grava taski dil Idani esas la
larjigo di la personala bazo dil Ido-movemento.
Cetere, nia honorprezidanto G. Anton diskursis koram plu yuna publiko.
Saluti amikala
Eberhard Scholz
Ido-Amiki Berlin
Retre a la pagino pri la novaji che la Germana Ido-Societo
Retre a la komencpagino dil Germana Ido-Societo