Ido en la futuro
Ulanokte me sonjis. Me esis transportita al futuro. Me vidis splendida ultramoderna urbi en Siberia, ne tro vasta, ne tro mikra. Ibe homi de tre diversa origini etnala kunvivis pace. Kelka ek li parolis Ruse o plura diferanta etnala lingui, ma la plu-multo parolis...Ido. Pose me saveskis ke en la yaro 2030 existas imensa Europana Uniono qua extensesas de Konnemara (Irlando) til Kamchatka (Rusia). La komuna linguo es Ido qua parolesas omnube e savesas da omni. Certe la nacionala ed etnala lingui permanas e docesas en la skoli, ma onu docas anke omnaloke l'Idolinguo. En Siberia qua populizesis recente da homi veninta de omna Europana regioni e de la tota mondo, Ido esas quaze heme. Certe onu docas la Rusa en la skoli pro ke ol esas la landoprovincala linguo. Ma la homi qui venas de tre diversa Europana regioni e mem de multa mondo-regioni, ne havas tempo por lernar la desfacila Rusa linguo e do uzas Ido. Siberia nun es tre prosperoza pro la inteligenta explotado di olua naturala richaji ed ol esas la mondo-parto dil futuro plena de posiblesi por la homaro.
La chefurbo dil Europana Uniono es Sankt Petersburg dum ke Moskva esas olta di Rusia. En l'anciena provincolandi di West-Europa onu vivas bone, ma dormeme. Ibe, la yuna ed agema homi ekmigras altraloke. Omna grava moderna aquiraji kreesas en Esto e la nova provincolandi same kam Rusia esas plena de vivo ed aktiveso.
Ido es ne nur uzata en E.U., pro la importanteso di E.U. e la simpleso di la linguo, onu uzas ol en Japonia, Chinia, Sud-Amerika ed en la tota mondo.
Nunatempe la Angla esas esas nur nacionala linguo dil Angle-parolanta landi.
Bela sonjo kad ne ?
La originalo di ca texto esas lektebla en "Letro Internaciona" ,numero 9 Julio-Agosto-Septembro 1998.
La revueto "Kuriero Internaciona ", qua intertempe remplasis "Letro Internaciona", esas abonebla por la yarala kontributo de 10 Euro o 5 internaciona respondkuponi ye:
12, rue Maurice Utrillo
F-91600 Savigny sur Orge
Francia
Ica pagino esas kreita ed aparigita per la kara permiso dil autoro de la texto da
Nürnberg, la 24ma di septembro 1998 yaro