L’
unesma Ido-kunveno di la triesma yarmilo
Dum sundio, la
07esma di januaro 2001 en la Nord-Est-Germana urbeto Anklam en la restorerio
“Dabers" eventis l'unesma importanta Ido-evento dil nova yarmilo:
Cirkume ye la
17a horo l’ Ido-amiki Wolfgang Quies,
Eberhard Scholz e Frank Kasper renkontris en la mencionita restorerio. Unesme
ni salutis jurnalisto, qua sequis nia invito partoprenar
en nia mikra, ma amikala Ido-rondo. Lu questionis ni pri nia experienci kun la
linguo internaciona e quan ni pensas pri la difuzado, la futuro e pri la chanci
por ol. Lu anke kun grandega intereso regardis parto dil interreta Ido-pagini
precipue dil Germana Ido-Societo e dil ULI, ultre altri l'unesma leciono dil
Germana Ido-kurso, l'Ido-konkurso
per artikli en Ido ed anke l'informi pri la diversa existanta Ido-forumi
che egroups ye
l'ULI-komencpagino.
Fine lu facis
fotografuro de nia Ido-rondo.
|
|
|
La partoprenanti en l’unesma Ido-renkontreto dil nova yarmilo: Eberhard Scholz ,
Frank Kasper , Wolfgang Quies (de sinistre a dextre) |
Ni ankore
informis lu pri la cayara Ido-renkontro en
Nürnberg. Lu promisis preparar artikli por du Nord-Est-Germana jurnali. Un artiklo intertempe
aparesis en la "Ostseezeitung".
Pos ke ni adiis la jurnalisto ni komencis nia diskuti koncerne Ido-problemi.
Kom bazo por nia
diskuto me prezentis la maxim recenta e-postala mesaji recevita e la faxi da
Günter Anton ed Alfred Neussner.
Unesme me
parlektis la saluti recevita da Günter Anton e Hans Stuifbergen.
Ni tri esas
tote kontenta pri la vigla diskuti en nia Ido-forumi e fine rezumis, ke ni
adminime per lektado o mem per partopreno ibe omnadie povas praktikar nia
linguo. Ni omni esas joyoza, ke la nombro dil membri en nia interreta
Ido-forumi durante kreskas. Ni anke konstatis, ke ni segun la vorti da Günter
Anton ne devez obliviar la developo dil Ido-movado extere dil interreto. Ni tre dezirus,
ke por exemplo la korespondo per postala letri e la persona interkomunikado
p.e. per telefonadi o viziti
esez tante vigla quale l'aktiveso ye l'interreto.
Regretinde segun la hodia bazala
kondicioni che la maxim
multa homi ta skopo esas tre desfacile realizebla, ma on adminime devus probar lo.
Granda parton di nia duhora diskuto kompreneble prenis la aferi koncerne
la cayara Ido-renkonto
en Nürnberg. Ni ankorfoye konstatis, ke sendubite esos
necesa aranjar la da Frank ante kelka dii propozita
babilrondo per "Idolisto"
precipue por ti, qui ne persone povos partoprenar.
Cetere ni diskutis la ya propozita ideo invitar linguala experto a nia renkontro,
qua esus pronta referar pri la vivo da un de la maxim famoza
idisti, Wilhelm Ostwald. Adminime Wolfgang e me konformas kun ta ideo.
Pose Eberhard propozis
preparar surprizo por la partoprenanti,
qua samtempe povos servar kom reklamo
por nia linguo.
Fine ni ankore
diskutis, quale ni povus sustenar un de la maxim aktiva idisti
ek Est-Europa por posibligar lua partopreno en nia renkontro e
decidis facar lo.
Cirkume ye la 20a horo finis nia amikala, agreabla e fruktoza Ido-renkontreto.
Ni adiis ed explikis nia espero balde itere renkontrar en la(lore forsan ya plu
granda) rondo.
Frank Kasper dum la se quanta dio
retrovenis a Nürnberg, la loko
dil internaciona Ido-renkontro 2001.
Ad Avane por
la skopo de nia Ido-linguo!!
Tia raporto esas facita da
Frank Kasper
Anklam / Nürnberg, la 12esma di januaro
2001
Retre a la komenco
di ca pagino
Retre a la komencpagino dil Germana Ido-Societo