Nekrologo pri Günter Anton (* 1929-12-29 ✝ 2021-01-14)

Nekrologo pri Günter Anton (* 1929-12-29 ✝ 2021-01-14)


Günter Anton

29ma di decembro 1929 - 14ma di januaro 2021

La yaro 2021 komencis por nia Germana Ido-Societo kun trista novajo. La ex-prezidanto di la Germana Ido-Societo ed ex-prezidanto di la internaciona Ido asociuro ULI Günter Anton mortis ye la 14ma di januaro 2021 pro la Korona-viruso.
Ilua filiino Cornelia Anton informis ni pri ilua morto.
Ankore ye la 27ma di decembro 2020 Günter Anton festis kun sua familio sua 91ma naskodio.

Günter Anton certe apartenis a la maxim importanta personi di la Germana Ido-movado pos la Duesma mondomilito. Il naskis ye 29ma di decembro 1929 e lojis en Köthen en Est-Germania en la hodiala federala lando Saxonia-Anhalt. Günter Anton konoceskis Ido ye la yaro 1945 per la Idisto Paul Bohne. En la hemo di Paul Bohne il lernis Ido sub la devizo "Lernez sen sufrar". Ye la yaro 1946 Günter Anton laboris kom fluviala navisto e pauzis por un yaro kun Ido.

En la yaro 1948 Paul Bohne sucesis fondar Ido-societo en Köthen. Segun Günter Anton ca klubo atingis la nekredebla numero di 75 membri (!). Lore eventis reguloza renkontri di Idisti. Per Paul Bohne Günter Anton komencis korespondar kun exterlandana Idisti quale Tom Lang de Unionita Rejio. Li du Idisti havis plu kam 45 yari amikala relati.

Pos la yaro 1947 Günter Anton komencis lernar en Köthen la profesiono di muldisto e finis ca aprentiso en 1949. Esis la yaro di la fundo di la amba Germana stati ed en la Germana Demokrata Republiko ube Günter Anton lojis privata societi interdiktesis. La aktiva Idosocieto en Köthen dissolvesis. Ca absurda interdikto restis til la fino di la Germana Demokrata Republiko en la yaro 1990. La konsequantaji por Ido esis grava pro ke nur mikra grupo di Idisti restis inter li Günter Anton qua durigas sua aktivesi por Ido private e sekrete.

Pos la yaro 1947 Günter Anton komencis lernar en Köthen la profesiono di muldisto e finis ca aprentiso en 1949. Esis la yaro di la fondo di la amba Germana stati ed en la Germana Demokratiala Republiko ube Günter Anton lojis privata societi interdiktesis. La aktiva Idosocieto en Köthen dissolvesis. Ca absurda interdikto restis til la fino di la Germana Demokrata Republiko en la yaro 1990. La konsequantaji por Ido esis grava pro ke nur mikra grupo di Idisti restis inter li Günter Anton qua durigas sua aktivesi por Ido private e sekrete.

En la yaro 1949 Günter Anton studiis germanistiko en Halle por divenar instruktisto. Il docis Germana linguo e literaturo a pueri e yuni inter 12 e 16 yari en la klasi 5 til 10. Il komencis laborar kom instruktisto en la skolo di vilajo Rubkow en la nordesto dil Germana Demokratiala Republiko ne fore de la Baltika Maro.

Ma dum omna yari Ido pleis granda rolo en sua vivo. Il durigas korespondar kun nombroza Idisti en multa landi. Ja ye la yaro 1956 il havis kontakti kun Idisti de la Sovietuniono quale Valdis Sprogis de Latvia e Boris Aaronov de Ukraina e kun Rudolf e Boris Marechek de Kirgizia. Esis aktiva Ido-grupi en Latvia, en Kiev, en Frunze (hodie: Bishkek) ed Alma-Ata (hodie: Almaty).

Günter Anton naracis a sua studenti pri Ido e mem komencis docar Ido en sua skoli ye la yaro 1958 dufoye en la semano. Ma balde ca docado mustis finar pro ke la skolo suspektis ke la skolani neglijis la studiado dil Rusa linguo pro Ido. Ye la yaro 1964 Günter Anton fondis en la kulturo-domo di Murchin apud Anklam "Klubo di internaciona amikeso" qua ofris lernar la Angla, la Rusa, Ido ed Esperanto.

Günter Anton anke lernis Esperanto ed esis en kontakto kun adheranti di la linguo da Zamenhof. En la yaro 1965 la Germana Demokratiala Republiko permisis ke Esperanto povas organizar su. Günter Anton partoprenis en kelka Esperanto kongresi, ma restis fidela ad Ido. Il refuzis laborar profesionale por Esperanto en la Germana Demokratiala Republiko. Il vizitis la Chekoslovaka chefurbo Praha e renkontris ibe la Idisti Karel Cizek, Karel Novy e Dro. Stasny. Ye la yaro 1965 Günter Anton renkontris en Budapest Idisti Dro. Arpad Vigh e Janos Flittner.

Ye la yaro 1969 Günter Anton translojis ad Elsnigk en Saxonia-Anhalt. Il komencis korespondar kun Idisti de multa landi e docis Ido private.

Anke pos la riunionigo di Germania Günter Anton durigis sua aktivesi por Ido. Il facis diskursi pri Ido che la Germana Societo por Interlinguistiko en Berlin. Ye la yaro 2001 "Pri la strukturo e developo di Ido en komparo kun Esperanto“ e ye la yaro 2002 pri „Kelka noti pri Ido e la Ido-movado hodie“. Il divenis prezidanto di la Germana Ido-Societo e la internaciona Ido-organizuro ULI. Günter Anton restis til sua morto honor-prezidanto di la ULI.

Me persone memoras Günter Anton dum la internaciona Ido-renkontro en Dessau. Ni facis exkurso a Köthen e rekontris en ilua domo il. Ni sidis en ilua gardeno e diskutis pri nia movemento.

Günter Anton bone perceptis nia problemo ke ni mustas trovar moyeni quale ni povas ligar homi qui lernis Ido durive ad Ido e nia movado. Günter Anton ipse esis tre tolerema ad altra internaciona lingui quale Esperanto, Interlingua ed Interlingue-Occidental. Il sempre havis bona relati kun adheranti di altra helpolingui ed avertis pri fanatismo. Il tre bone karakterizis Ido en komparo kun la altra internaciona lingui: "Esperanto impresis me pro olua granda difuzo e pro lua praktikala valoro. Ma me opinionas ke Ido esas quale la 'ora mezo' inter la sistemi naturalista (quale Interlingua ed Interlingue-Occidental – TS). Ol esas liberigita de nenecesa desfacilaji di Esperanto ed anke de parto di sua nenaturale aspektanta konstruktita vortformi, exemple de la 'puzzle-ludo' dil vortformacado [...]." (Anton, Günter: Ka mea vivo esas sencoplena? (Duro), en: Progreso 307 (1996), p. 7).

Me tote konsentas kun ca opinino. La morto di Günter Anton esis granda perdo por la nia movado. La Germana Ido-Societo kondolis ilua filiino Cornelia e Gudrun ed Eberhard Scholz sendis en la nomo di nia asociuro flor-krono por la tombo di Günter Anton.

Günter Anton mem dicis ante multa yari Ido havis granda importo por sua vivo e ke sua vivo ne esis sencoplena. Il rezumis ye la yaro 1996 en Progreso pri sua vivo: "Vere, me esas konvinkita ke mea vivo esas sencoza [...]. Ido pleis granda rolo en mea vivo e me konsakris tre multa tempo ad ol ed anke a lua difuzo [...] Mea agado (por Ido) ne esis vane, nam ol kontenigis me e felicigis me en certena grado. Pro quo? Ho, per Ido me ganis tre bon amiki e konoceskis tre interesiva homi."

Do Ido esis importanta por Günter Anton, ma Günter Anton ipsa esis importanta por Ido e la Ido-movado. Ni konservos la memoro di ca eminenta Germana Idisto e durigas laborar por nia komuna linguo Ido.
Restez en paco Günter Anton! Tua agado certe ne esis vane!

Ica nekrologo skribesis da
d-ro Thomas Schmidt
Prezidanto dil Germana Ido-Societo.r.a.

Yen kelka kondoli pro la morto di Günter Anton


"Me multe regretas la transmondesko di nia kara samideano, Günter Anton, qua, dum sat multa yari, esis aktiva membro di nia forumo IdoCatalaOccitan (Yahoo), quankam il ne plus partoprenis ol de plura yari ante nun. Ni nul-tempe oblivios l'amiko Günter, nek omno quon il facis por nia Idolinguo.

Repozez en paco, Gontru! Ido vivez!

Partaka"


"Me personale konoceskis Günter lor la Ido-renkontro en Berlin (2006), ube il i.a. interpretis, de Espo ad Ido, interesiva diskurso da Detlev Blanke, e, del Germana ad Ido, la expliki da turistala guidero dum tra-urba exkurso per autobuso. Neobliviebla instanti! Neobliviebla homo! Me anke korespondis kun il dum kelka tempo ante ta renkontro.

Günter skriptis multa pensigiva artikli por Progreso, quin penvalorus kolektar e publisar kom broshuro, nam lua konsideri e reflekti pri la Ido-movemento duras esar atencinda.

Kara Günter, ne adio! Me preferas dicar "til rivido"!

Gonçalo Neves"


"Kar amiki,

vere tre trista novajo por omni. Günter e me interchanjis letri dum kelka tempo, ube il naracis a me kelke pri lua vivo kom docisto ed Idisto. Desfortunoze, me nultempe konocis personale il.

Repozez en paco.

Antonio Martinez"

function:RenderStopWatch