Deutsche Ido-Gesellschaft / Warszawa2007

Berlinana Idisti vizitis Warszawa dum la tempo inter la 21ma e la 23ma di julio 2007

Por reale exercar konversar en Ido delonge ni projetis renkontro kun samideani, qui ne parolas nia Germana linguo e ni ne parolas lia. Ube lojas Ido-parolanti e maxim posible ne-fore? Do ni decidis voyajar per treno ad-este, direte a Warszawa. Nia esquado esis plugrandigita da la gespozi Neussner e dal Estoniano Anvarzhon Zhurajev. Ni omna salutesis ye la chefa staciono en Warszawa da konocata Idisti: Katarzyna Tempcyk, Jerzy Gralak, Wanda e Vlado Yakovenko. Anke familiani salutis ni. Esis tre kordiala acepto.

Ni transportesis a „nia“ hotelo per autobuso, quan ni anke povis uzar dum la plusa 2 jorni en la tota urbego. Duktita da nia afabla samideani ni vizitis la komplete restaurita quartero historiala kun olua aparta atmosfero, strado-muzikisti ed -artisti. La vetero esis belega.

Omnaloke Polona historio esas prezenta . La monumento di la revolto di Warszawa memorigis da ni , ke la urbala centro esis tote destruktita da la Germana fashisti. Tre multa homi, mem mulieri ed infanti, esis ocidita. Ye la „Ghetto“-monumento, che qua la lora kancelero W. Brandt genupozis, anke ni honorizis emoce la viktimi di Judala populo. Impresiva esas la monumento dedikita a la deportiti dum la Stalinisma epoko. Ma anke on trovas monumento pri la milito-frateso Polona-Rusa.

De dextre a sinistre: Hans-Georg Winkler, Katarzyna Tempcyk, Anvarzhon Zhurajev, Inga Großmann, Ferdinand Möller, Eberhard Scholz, Jerzy Gralak, Alfred Neußner, Vlado Yakovenko, Heidi Neußner

Maxim interesiva esis nia viziti che la Zamenhof- memoreyi. En la „Ulica Zamenhofa“ , en qua olim stacis la lojo-domo di la kreinto dil Esperanto, ni honorizis respektoze ta persono, qua divenis 1894 per lua emendo-propozi pri l´Esperanto quaze la pre-patro dil Ido. En centesma yaro di Ido ni volunte memoras pri ca eminenta linguisto. Ni anke trovis lua tombo ed ita di lua parenti en la judala tombeyo.

En Warszawa trovesas famoza parki belega. Somere on povas askoltar koncerti di pianisti infre la skulturo konsakrita a la magna kompozisto Chopin en la parko „Lazienkowski“. Kompreneble esis sat multa tempo por propra deskovradi exemple la citadelo, historiala tramvoyo, la kolono di Sigismund, „Salsa“-danceyo, la restorerio „Babushka“ o la ortodoxa kirko. Warszawa ofras ulo ad omnu.

Evidente , inter la biri „Zywiec“ esas tre bona produkto, qua faciligas la Ido-parolado. Ube ni konversos future per Ido ? Ka forsan nia nexta voyajo duktos ni ad Estonia ? La invito da Johnny (Anvarzhon Zhurajev) esas lurinda ed atraktiva.

Nu, ni rezumas :
Kordial acepto ye l´unesma jorno ed emocigant adio kun multa embracuri laste. L´amikesal atmosfero, la turismal interesiva programo e multa konversadi, lo omna restos ne-obliviebla. Danko vers vi , kara Katarzyna, kara Jerzy e kara Vlado, multa danko pro via hosteso.

Eberhard Scholz
administranto dil Ido-Amiki Berlin